एसआरसी अध्यक्ष पदम गुरूङको शव उद्धार

नाम्ची (निसं): सिक्किमको नाम्ची सरकारी महाविद्यालयका एसआरसी (स्टुडेन्ट रिप्रेजेन्टिभ काउन्सिल) अध्यक्ष पदम गुरूङको शव आज बिहान फेला परेको छ। प्राप्त जानकारी अनुसार मंगलबार रातिदेखि निखोज भएका दक्षिण सिक्किम नाम्ची छुबा परबिङ निवासी पदम गुरूङको शव गत राति परेको पानीले भिजेको अवस्थामा आज बिहान काजीटार इलाकाको नालीबाट पुलिसले उद्धार गरेको छ। पुलिसले घटनास्थलबाट शवलाई उद्धार गरेपछि पोस्टमर्टमको लागि एसटीएनएस अस्पतालमा पठाई दिएको छ। यसको साथै पुलिसले घटनाको जाँच शुरू गरेको बताएको छ। के कारणले तिनको मृत्यु भएको हो अथवा कसैले हत्या गरेर फ्याँकेको हो भन्ने बारे हालसम्म सटिक पत्तो नलागेको तर पोस्टमर्टम रिपोर्ट पछि नै घटनाको वास्तविकता थाहा लाग्ने पुलिस सूत्रले जनाएको छ।