आमा-छोरीको रहस्यमय मृत्यु काण्ड : एक वर्षपछि पक्रा परेका प्रदीप चौधरी अदालतमा पेश

सिलगढी, 16 दिसम्बर (निसं): आमा-छोरीको रहस्यमय मृत्यु मामिलाको फाइल एक वर्षपछि अचानक खुल्यो। फाइल खुल्नको साथै सिलगढीको आशीघर आउटपोस्ट थानाका ओसी पप्पू सिंहको नेतृत्वमा पुलिसले आइतवार एकजना व्यक्तिलाई पक्राउ गरेको छ। आरोपीको नाम प्रदीप कुमार चौधरी उर्फ पीके हो। प्रदीप कुमार चौधरीलाई भूमिया भन्ने नामले पनि चिनिन्छ। लगभग 8 महिना अघि प्रदीप कुमार चौधरीलाई जमीनमा अवैध कब्जा र किनबेचको मुद्दामा आशीघर पुलिसले पक्राउ गरेको थियो। तर यस पटक उसलाई आमा-छोरीको रहस्यमय मृत्युको मामिलामा पक्राउ गरिएको छ।
स्मरण रहोस, गत वर्ष 3 दिसम्बर 2023-मा सिलगढीको 36 नम्बर वार्डको शान्तिनगर क्षेत्रमा बन्द कोठामा पुलिसले आमा लता सरकार र उनकी छोरी तियासा सरकारको शव संदिग्ध अवस्थामा उद्धार गरेको थियो। घटनास्थलबाट पुलिसले एउटा सुसाइड नोट पनि भेटाएको थियो, जसमा प्रसेनजीत राय, सुभाष दास, सुनील दास, सुजीत घोषका नामहरू उल्लेख गरिएको थियो। त्यसपछि मृतकका पतिको नाममा साधन सरकारले पत्नी र छोरीलाई आत्महत्या गर्न उक्साएको आरोपमा तृणमूल नेता प्रसेनजीत रायसहित पाँच जनाको विरुद्ध आशीघर आउटपोस्ट थानामा उजुरी दर्ता गराएका थिए। त्यसपछि उजुरीमा नाम भएका व्यक्तिहरूसँग पुलिसले प्राथमिक सोधखोज गरेको थियो। तथापि, कसैलाई पनि पक्राउ गरिएको थिएन।
समयसँगै, आमा-छोरीको रहस्यमय मृत्यु मामिला लगभग 1 वर्ष पुरानो भइसकेको थियो। तर अचानक उक्त रहस्यमय मृत्युको फाइल खुल्यो र आइतवार राति आशीघर आउटपोस्ट पुलिसले प्रदीप कुमार चौधरीलाई पक्राउ गरेको छ। यसको साथै पुलिसले तिनका साथीहरूको खोजी शुरू गरेको छ। उक्त रहस्यमय मृत्यु मामिलामा प्रदीप चौधरीको हात रहेको पुलिसले आशंका गरेको छ। आज पुलिसले आरोपीलाई जलपाईगढी अदालतमा पेश गरेर रिमाण्डको माग गरेको छ। पुलिसले यस घटनाको विस्तृत छानबिन गरिरहेको छ।