क्यारोन : बन्दको समर्थनमा आज बिहान सीपीआईएम समर्थकहरू डुवर्सको क्यारोन रेलवे स्टेशन परिसरमा धेरै संख्यामा भेला भए। बिहान सात बज्न अगावै यहाँको चेङ्मारी चियाकमान अनि लुकसान क्षेत्रका सीटु समर्थक चियाकमानका श्रमिकहरू जुलूसको साथमा स्टेसन परिसरमा भेला भएका थिए। तिनीहरूले रेलवे स्टेशनमा ट्रेनहरू पनि रोके। यस अवधि कुनै पनि ट्रेनहरू चलेन। बिहानको समय दार्जिलिङ डाउन पेसेन्जर ट्रेनलाई बन्द समर्थकहरूले दालगाउँ स्टेशनमा अनि मर्निङ डेमो ट्रेनलाई मालबजार स्टेसनमा रोके।
उक्त घटनाको जानकारी पाएपछि परिस्थितिलाई नियन्त्रणमा ल्याउन तथा कुनै प्रकारको अप्रिय घटना नहोस् भनेर नगरकट्टा थानाका ओसी सञ्जु बर्मन दलबलसहित स्टेसन परिसरमा पुगेर बन्द समर्थकहरूलाई त्यहाँबाट हटाउने प्रयास गरे। यस अवसरमा सीटु नेता दिल कुमार उरावले श्रमिकहरूको न्यूनतम मजदुरी, सरकारी सम्पत्तिहरूको बिक्री बन्द गर्नुपर्ने साथै नीजिकरणको प्रतिवादलगायत मोठ 12 वटा मागहरू लिएर आज 24 घण्टा बन्द बोलाएको बताए। बन्दले गर्दा विशेष गरेर ट्रेनको यात्रीहरूलाई धेरै असुविधाको सामना गर्नपरेको देखियो भने रेल यात्रीहरू स्टेसन परिसरमा पुगेर ट्रेन बन्द रहेको थाहा पाएपछि आआफ्नो घरतिर फर्किए।