भाजपाको सिलगढी 3 नम्बर वार्डमा घर-दैलो अभियान शुरू

सिलगढी : भाजपाले आउँदो 2021-मा हुने विधानसभा चुनाउ तथा सिलगढी नगरनिगमको चुनाउलाई ध्यानमा राखेर विभिन्न शिविरहरूको आयोजना गर्दै आइरहेको छ। यसै क्रममा आजदेखि सिलगढी नगरनिगमको 3 नम्बर वार्ड भाजपा कमिटीको तर्फबाट घर-दैलो अभियान शुरू गरेको छ। कोरोना महामारीको समयमा सिलगढी सांगठनिक भाजपा कमिटीको तर्फबाट सदस्य संख्या वृद्धि गर्ने उद्देश्य लिएर ‘हाम्रो परिवार भाजपा परिवार’, ‘चिया चर्चा’ आदि जस्ता अभियान  शुरू गरेको छ। आज भाजपा 3 नम्बर वार्ड कमिटीका अध्यक्ष विनोद गुप्ताको नेतृत्वमा पार्टीका कार्यकर्ता तथा सदस्यहरूले घर दैलो अभियान चलाएर प्रधानमन्त्री नरेन्द्र मोदीको सन्देश सबै मानिसहरूसमक्ष पुर्‍याउनको साथै मानिसहरूलाई माक्स पनि वितरण गरेको बताइएको छ। आगामी 10 दिनसम्म उक्त अभियान जारी रहने पार्टी सूत्रमार्फत् थाहा लागेको छ। यस अवसरमा 3 नम्बर वार्ड कमिटीका अध्यक्ष विनोद गुप्ता लगायत भाजपाका अन्य कार्यकर्ता तथा सदस्यहरू उपस्थित थिए।