बाइकमा सवार दुष्कृतिहरूले गोली हान्दा जमिन व्यवसायी घाइते

सिलगढी : सिलगढीको 38 नम्बर वार्डमा गत राति एकजना जमिन व्यवसायीलाई केन्द्र गरेर गोली चलाएको घटनाले इलाकामा सनसनी मच्चियो। भक्तिनगर थाना पुलिस तथा डिटेक्टिभ डिपार्टमेन्टले घटनाको जाँच शुरू गरेको छ। प्राप्त जानकारी अनुसार गत राति विद्युत साहा घर नजिकैको एउटा अफिसमा बसिरहेको समय बाइकमा सवार भएर दुईजना दुष्कृति त्यहाँ आएर तिनलाई लक्ष्य गरेर गोली चलाउँदा तिनको छात्तीमुनि गोली लागेपछि तत्कालै तिनलाई सेभोक रोडको एउटा नर्सिङ होममा भर्ना गरेपछि हाल तिनी उपचाराधीन अवस्थामा छन्। यसपछि रातिनै डीसीपी जय टुडू, एसीपी शुभेन्द्र कुमार लगायत भक्तिनगर थाना तथा आसिघर आउटपोस्ट पुलिस घटनास्थलमा पुगे। स्मरण रहोस्, केही महिना अघि जमिनको अवैध व्यवसाय गरेको आरोपमा विद्युत साहालाई आसिघर आउटपोस्ट पुलिसले पक्राउ गरेको थियो। तथापि, तिनलाई किन गोली चलाएको भन्ने विषयमा पुलिसले जाँच शुरू गर्नको साथै दुष्कृतिहरूको खोजी शुरू गरेको बताइएको छ।