छात्रा हत्याकाण्डको दोषीलाई चाँडै पक्रिएर कठोर सजाय दिनुपर्ने मागमा भाजपाले सिलगढीमा निकाल्यो रेली

सिलगढी (निसं): सिलगढीको पलासबाडीबाट लापता 12 वर्षीय छात्राको शव सड़ेको अवस्थामा सुकनाको फरेष्ट इलाकाबाट उद्धार भएको छ भने उक्त हत्याको आरोपीलाई अझसम्म पुलिसले पक्राउ गर्न सकेको छैन्। यसैले उक्त घटनाको विरोध गर्नको साथै आरोपीलाई चाँडै पक्राउ गरिनु पर्ने मागमा आज फेरि सहरमा भाजपाले एउटा विरोध रेली निकाल्यो। भारतीय जनता पार्टीको सिलगढी सांगठनिक जिल्ला सदस्यहरूले आज सिलगढीको हाशमी चौकबाट उक्त रेली निकालेर सहरको विभिन्न इलाकाको परिक्रमा गरेपछि पुनः हाशमीचौकमा फर्किएर समापण गरियो। उक्त रेलीको नेतृत्व सिलगढी साङ्गठनिक जिल्ला भाजपा अध्यक्ष तथा मातिगड़ा-नक्सलबारीका विधायक आनन्दमय बर्मनले गरेका थिए। यस अवसरमा विधायक आनन्दमय बर्मनले घटनाको यति दिन बितिसक्दा पनि मुख्य आरोपीलाई पक्राउ गर्न पुलिस असफल भएको आरोप लगाए। तिनले दोषीलाई चाँडै पक्रेर कठोर सजाय दिनु पर्ने माग गरेका छन्।