चियाश्रमिकहरूलाई न्यानो लुगा-फाटा वितरण

खोरीबारी : पानीघट्टा तथा नक्सलबारीको बन्द चियाकमानका श्रमिकहरूलाई रायगञ्जको सहमर्मी संस्थाको तर्फबाट आज न्यानो लुगा-फाटा वितरण गरियो। एउटा कार्यक्रमको माध्यमद्वारा चियाश्रमिकहरूलाई उक्त न्यानो लुगा-फाटा वितरण गरियो। यस कार्यक्रमको सञ्चालनमा नक्सलबारी आलोर पथयात्रीले पनि सहयोग गरे। कार्यक्रममा सहमर्मी संस्थाका सचिव झुमा मित्रा, अध्यक्ष एस घोषलगायत 20 जना सदस्यहरू, नक्सलबारी आलोर पथयात्रीका धर्मेन्द्र पाठक, अभिषेक घोष, ओम प्रकाश छेत्रीलगायत अन्य मानिसहरू उपस्थित थिए। रायगञ्जको सहमर्मी संस्थाका सदस्यहरूले नक्सलबारीको मान्झा चियाकमान तथा पानीघट्टाको बन्द अवस्थामा रहेको चियाकमानको लगभग 1 हजार श्रमिकहरूलाई न्यानो लुगा-फाटा प्रदान गरेको धर्मेन्द्र पाठकले बताए।