फूलबारीमा मोबाइल टावरको उपकरण चोरी गर्दा रंगेहात पक्रा परे युवक

फूलबारी, 29 नोभेम्बर (निसं): मोबाइल टावरको उपकरण चोरी गरिरहेको समय एकजना युवकलाई स्थानीय मानिसहरूले रंगे हात समातेर पुलिसको हातमा सुम्पिदिएको छ। यो घटना आज सिलगढी संलग्न फूलबारीको आमाइदिघी क्षेत्रमा घटेको हो। पक्रा परेका युवकको नाम ऋषिकेश विश्वास हो, उनी रामपुरहाट निवासी हुन्। स्थानीय वासिन्दाहरूले बताए अनुसार फूलबारी आमाइदिघी क्षेत्रमा रहेको एउटा मोबाइल टावर धेरै समयदेखि बन्द अवस्थामा रहेको छ। उक्त टावरको सामान केही समयदेखि चोरी भइरहेको थियो। आज युवक उक्त टावरमा पार्ट्स चोरी गर्न आइपुगेको थाहा पाएपछि स्थानीय वासिन्दाहरूले उनलाई समातेर पुलिसलाई खबर दिए। खबर प्राप्त भएपछि न्यू जलपाइगढी थाना पुलिस घटनास्थलमा पुगेर युवकलाई आफ्नो नियन्त्रणमा लिएर थानामा लगे।