आईएनटीटीयुसी-द्वारा रेलवे जल वितरण विभागका अस्थायी कर्मचारीहरूको मागलाई लिएर ज्ञापन

सिलगढी : रेलवे जल वितरण विभागका अस्थायी कर्मचारीहरूको विभिन्न मागलाई लिएर आज आईएनटीटीयुसी न्यु जलपाईगढी शाखाले आन्दोलन शुरू गरे। कोरोना महामारीले गर्दा देशभरि नै लकडाउन जारी रहेको थियो भने हाल परिस्थिति स्वाभाविक बनेपछि अनलक अवधि विभिन्न प्रतिष्ठानहरू खोलिए तापनि रेलवे परिसेवा बन्द रहेको छ। रेलवे परिसेवा बन्द रहेकोले गर्दा रेलवे जल वितरण विभागका अस्थायी कर्मचारीहरू समस्यामा परेका छन्। संगठनका सदस्यले बताएअनुसार रेल परिसेवा बन्द रहेकोले गर्दा हाल धेरैजसो कर्मचारीहरू बेरोजगार हुनको साथै बकाया रुपियाँ समेत पाएका छैनन्। यसैले बकाया रुपियाँ चाँडै प्रदान गरिनुपर्ने साथै तिनीहरूलाई पुनः कार्यमा नियुक्त गरिनुपर्ने माग गर्दै आईएनटीटीयुसी न्यु जलपाईगढी शाखाले आज रेलवे विभागका एडीआरएमसित भेट गरेर एउटा ज्ञापन पत्र चढायो। संगठनका अध्यक्ष प्रसनजीत रायको नेतृत्वमा उक्त विक्षोभ आन्दोलन गरेको बताइएको छ।