कालचिनीमा हात्तीको हमलामा वनकर्मीको मृत्यु

अलीपुरद्वार, २ जनवरी (निसं): हात्तीलाई जङ्गलतर्फ खेद्ने क्रममा हमला गर्दा एकजना वनकर्मीको मृत्यु भएको छ। जानकारी अनुसार अलीपुरद्वार जिल्लाको कालचिनी चिया बगानमा आज बिहानदेखि जङ्गली हात्तीको झुण्ड घुमिरहेको थियो। यसको सूचना पाएपछि विभिन्न रेञ्जका वनकर्मी साथै वन विभागका अधिकारीहरू घटनास्थलमा आइपुगेका थिए। त्यहि समय हात्तीको हमलामा मदन दीवान नामक एकजना वनकर्मीको मृत्यु भएको छ। जङ्गली हात्तीको झुण्ड हालसम्म पनि कालचिनी चिया बगानमा नै घुमिरहेको बताइएको छ। घटनास्थलमा वनकर्मीहरू तैनाथ छन् भने हात्तीहरूलाई जंगलतर्फ खेद्ने प्रयास भइरहेको छ।