मयनागढीमा माध्यमिक परीक्षार्थीको मृत्यु, ईलाकामा शोकको माहौल

जलपाइगढी, 20 फरवरी (निसं): जलपाइगढी जिल्लाको मयनागढी ब्लकअन्तर्गत रामसाई क्षेत्रमा एकजना माध्यमिक परीक्षार्थीको मृत्यु भएपछि इलाकामा शोकको माहौल छाएको छ। मृतक छात्रको नाम अभिजीत राय हो। उनी मयनागढीको चेङ्गमारी हरेन्द्रनाथ हाई स्कूलका विद्यार्थी थिए। पारिवारिक सूत्र अनुसार रामसाई क्षेत्रमा रहेका सदरु रायका छोरा अभिजीतको माध्यमिक परीक्षा केन्द्र मयनागढीको आमबाडी राममोहन हाई स्कूलमा थियो। उनले पहिलो दुई विषयका परीक्षा राम्रोसँग दिएका थिए, तर त्यसपछि उनलाई पेटमा दुखाइ शुरु भयो। पेट दुख्न थालेपछि उनलाई मयनागढी ग्रामीण अस्पतालमा भर्ना गरिएको थियो। त्यहाँबाट उनले एउटा विषयको परीक्षा दिएका थिए, तर जब अभिजीतको शारीरिक अवस्था बिग्रिन थाल्यो, तब उनलाई जलपाइगढी मेडिकल कलेजमा भर्ना गरियो। त्यसपछि उनको अवस्था अझ बिग्रिन थालेपछि परिवारजनले उनलाई जलपाइगढीको एउटा निजी अस्पतालमा भर्ना गराए, जहाँ अभिजीतको मृत्यु भयो। उक्त घटना पछि क्षेत्रमा शोकको माहौल छाएको छ। विद्यालय प्रबन्धन पक्ष पनि शोकित बनेको छ।