सिलगढीको चम्पासरीमा बदमाशहरूले लुटे एटीएम मशिन: लाखौं रुपियाँ लिएर कसे चम्पट

सिलगढी, 19 जून (निसं) : मयनागुडीपछि सिलगढीमा पनि रातिको अँध्यारोमा एटीएम लुटिएको छ। बुधबार राति सिलगढीको चम्पासारी मोड नजिकैको एउटा एटीएमबाट बदमाशहरूले लगभग 10 लाख 50 हजार रुपियाँ लुटेर भागेका छन्। यो घटना राति लगभग 2 देखि 2:30 बजेको समयमा भएको हो।
बदमाशहरूले एटीएम काउन्टरमा रहेका दुई वटा मसिनहरूलाई ग्यास कटरको प्रयोग गरेर काटे र ट्रेमा राखिएको नगद रकम लिएर भागेका छन्। उनीहरूले एटीएम काउन्टरको बाहिर र भित्र रहेका सीसीटीभी क्यामेरामा रङको स्प्रे गरेर फुटेज बिगार्ने प्रयास गरेका थिए। राति एटीएम-मा आगो समेत लागेको थियो। जानकारी पाएपछि प्रधाननगर थाना पुलिस र दमकलको गाडी घटनास्थलमा पुगेको थियो।
घटनाको क्रममा एउटा घरकी युवतीले विपरीत दिशाबाट आएको गाडीमा केही व्यक्तिहरू देखेकी थिइन्। उनले तत्कालै 100 नम्बरमा फोन गरेकी थिइन्, तर कल लागेन। त्यसपछि उनले आफ्ना पितालाई जानकारी दिइन् र एकजना पुलिस अधिकारीको मोबाइल नम्बरमा सम्पर्क गरेकी थिइन्। तर तबसम्म अपराधीहरू एटीएम लुटेर भागिसकेका थिए।
आज बिहान ब्याङ्क अधिकारीहरू घटनास्थलमा पुगेका थिए। उल्लेखनीय कुरा के छ भने, यो एटीएम लुट भएको ठाउँ प्रधाननगर थानाबाट लगभग 300 मिटरको दूरी मात्र छ। हाल पुलिसले चम्पासारी मोड र वरिपरिका क्षेत्रमा रहेका सीसीटीभी फुटेजहरू हेरेर जाँच सुरु गरेको छ।
स्मरण रहोस, केही दिनअघि मयनागुडीमा पनि यस्तै प्रकारको एटीएम लुटिएको थियो, जसमा भाग्ने प्रयास गरिरहेका केही अपराधीहरूलाई पक्राउ गरिएको थियो।