सिलगढीमा 20 लाख रुपियाँको यार्सागुम्बा उद्धार

राजगञ्ज (निसं): आमबाडी रेञ्जका वनकर्मीहरूले अभियान चलाएर एकपल्ट फेरि लगभग 20 लाख रुपियाँ मूल्यको यार्सागुम्बा उद्धार गरेको छ। प्रात जानकारी अनुसार बुधवार राति आमबाडी रेञ्जर आलमगीर हकको नेतृत्वमा वनकर्मीहरूले सिलगढीको विभिन्न ठाउँमा अभियान चलाएर लगभग 800 ग्राम यार्सागुम्बा उद्दार गरेको बताइएको छ। यसको अनुमानित बजार मूल्य लगभग 20 लाख रुपियाँ रहेको छ। स्मरण रहोस, गुप्य सूचनाको आधारमा आमबाड़ी रेञ्जका रेञ्जर आलमगीर हकको नेतृत्वमा वनकर्मीहरूले गत 8 सितम्बरको दिन सिलगढीको समरनगर इलाकामा अभियान चलाएर बहुमूल्य यार्सागुम्बा सहित दुई जनालाई पक्राउ गरेको थियो। सिलगढीमा हेन्डओभर गरेपछि तस्करहरूले यी यार्सागुम्बा नेपालको बाटो हुँदै चीनमा तस्करी गर्ने योजना बनाएका थिए। तर यसभन्दा अगावै गोप्य सूत्रको आधारमा अभियान चलाएर वनकर्मीहरूले उक्त दुई जना व्याक्तिलाई पक्राउ गरेको थियो। तिनीहरूबाट लगभग 13 ग्राम यार्सागुम्बा उद्धार गरेको थियो। आरोपीहरूलाई सोधखोज गरेपछि बुधवार सिलगढीको विभिन्न ठाउँमा अभियान चलाएर 800 ग्राम यार्सागुम्बा उद्धार गरेको छ। तथापि, उक्त मामिलामा कसैलाई पनि पक्राउ नगरिएको बताइएको छ।