सिलगढीमा अवैध कल सेन्टरविरुद्ध पुलिसको अभियान जारी, इस्कन मन्दिर रोडको भवनबाट महिलासहित 3 जना हिरासतमा

सिलगढी : सिलगढीमा फेरि अवैध रूपमा चलाइरहेको एउटा कल सेन्टरमा पुलिसले छापामार अभियान चलायो। सिलगढीको इस्कन मन्दिर रोडस्थित बिल्डिङको एउटा कार्यालयमा धेरै दिन अघिदेखि अवैध रूपमा कल सेन्टर चलाइरहेको साथै उक्त कल सेन्टरबाट विभिन्न ठाउँमा फोन मार्फत् मानिसहरूलाई प्रताड़ित गरिरहेको अभियोग पाएपछि आईसीको नेतृत्वमा भक्तिनगर थाना पुलिसले आज अभियान चलाएर एउटी महिला र  2 जना व्यक्तिलाई हिरासतमा लिएको छ। हिरासतमा लिएकाहरू सबै सिलगढी निवासी रहेको थाहा लागेको छ। उक्त तीनजनाले एउटा कम्पनीको नाममा अवैध रूपमा कल सेन्टर चलाउने गरेको अभियोग रहेको छ। तिनीहरूसित अन्य व्यक्तिहरू संलग्न रहेको हुन सक्ने आशंका रहेकोले गर्दा पुलिसले यसबारे जाँच शुरू गरेको बताइएको छ। उक्त कार्यालयबाट पुलिसले धेरैवटा कम्प्युटर, सिम कार्ड एवम् मोबाइलहरू उद्धार गरेको छ। स्मरण रहोस्, यसभन्दा अघि पनि सिलगढी पुलिस कमिश्नरेटले सहरको विभिन्न ठाउँहरूमा अभियान चलाएर  अवैध कल सेन्टरहरू बन्द गरिदिनको साथै धेरैजना युवा-युवतीहरूलाई हिरातसमा लिएको थियो।