बक्सा ब्याघ्र प्रकल्पको जङ्गलबाट व्यक्तिको कङ्काल उद्धार

हेमिल्टनगञ्ज : बक्सा ब्याघ्र प्रकल्पको जङ्गलबाट एकजना व्यक्तिको कङ्काल उद्धार भएको छ। उक्त घटना कालचिनी ब्लकको हेमिल्टनगञ्ज रेञ्ज अन्तर्गत जङ्गलको घटना हो। आज वन कर्मीहरूले टहलदारी अवधि मानव कङ्काल देखेपछि घटनाबारे पुलिसलाई खबर दिए। घटनाको खबर पाएर पुलिसले उक्त कङ्काल उद्धार गरेको छ भने मृतक व्यक्तिको परिचय तथा मृत्युको कारण थाहा लागेको छैन। कुनै वन्य प्राणीको हमलामा उक्त व्यक्तिको मृत्यु भएको हुनसक्ने पुलिसले प्राथमिक अनुमान लगाएको छ। उक्त शव लगभग डेढ-दुई महिना पुरानो हुनसक्ने पुलिसले अनुमान लगाएको छ। उद्धार गरेको मानव कङ्काल पोस्टमार्टमको लागि पठाइने पुलिस सूत्रले जनाएको छ।