सिलगढी (निसं): चोरी गर्न अघि चोरहरूले होटलमा पहिला डम्मै पेट भरिञ्जेलसम्म खाना खाए अनि यसपछि होटलमा राखेका समानहरू चोरी गरेर चम्पट कसे। उक्त घटना गत राति सिलगढीको सेभोक रोडस्थित एउटा होटलमा घटेको हो। प्राप्त जानकारी अनुसार होटलका मालिक सदा झै आज बिहान होटल खोल्न आइपुगे। यसपछि होटल खोलेर हेर्दा दैलोको एउटा भाग काटेको अवस्थामा देखे। यसको साथै होटलका भाडा-बर्तनहरू लगायत अन्य सामानहरू पनि हराएको थाहा पाए। यति मात्र होइन, चोरहरूले चोरी गर्न अघि होटलमा राखेको खाना पनि आरामसित खाएर निक्लिए।
घटनाबारे होटलका मालिकले भने, गत राति होटल बन्द गरेर सबै कर्मचारीहरू घर गए। आज बिहान होटल खोल्न आउँदा चोरी भएको थाहा पाए। चोरहरूले होटलको दैलौ काटेर चोरी गरेको रहेछ। यसको साथै, होटलमा राखेको खाना पनि आरामसित खाएर गएका छन्। घटनाबारे तिनले भक्ति नगर थाना पुलिसलाई जानकारी दिए। सूचना पाएपछि पुलिस घटनास्थलमा पुगेर जाँच शुरू गरेको छ।