कोरोनाबारे तकदाह खण्ड विकास कार्यालयद्वारा मानिसहरूलाई सचेतना

मङपु: रंगली रंगलीयट, तकदाह ब्लक अन्तर्गत पर्ने विभिन्न क्षेत्रहरुमा कोरोनाको दोस्रो लहर बारे मानिसहरूलाई सचेतना गराउँदै आज तकदाह टिस्टा भेल्ली समष्टि अनि लाब्दा मङपु समष्टिमा कार्यालयका कर्मचारी ललित रायको नेतृत्वमा कर्मचारीहरूले माइकिङ गरे। यस अवसरमा सबै जनतालाई माक्स अनिवार्य रूपमा लगाइदिने, सेनिटाइजरको प्रयोग गरिदिने, सामजिक दुरीलाई पालन गरिदिने साथै भीड-भाड भएको क्षेत्रहरुमा नगइदिने अपील गर्दै माइकिङ गरियो। हाल कोरोनाको दोस्रो लहरले देशभरिमैं सङ्कट देखा परेको बेला कोभिड 19 बारे सरकारी नियमलाई सबैले पालन गरिदिने तिनीहरूले अपील गरे। यस तकदाह खण्ड अन्तर्गत पर्ने सबै होम स्टेका मालिकहरुलाई पनि कोभिड 19 बारे सरकारद्वारा निर्देश गरेको नियमलाई पूर्ण रूपले पालन गरेर मात्र पर्यटकहरुलाई राख्ने अपील गरे। यसको साथै सरकारद्वारा जारी गरिएको कोभिड 19 सम्बन्धी नियमवाली नोटिस होमस्टे मालिकहरुलाई वितरण गरे।