सिलगढी (निसं): गाडीधुरास्थित सहिद मेजर दुर्गा मल्लको सालिक परिसरमा आज गाडीधुरा नवदीप परिवारको आयोजनामा 80औँ बलिदान दिवस पालन गरियो। क्लबका सभापति गोबिन्द आचार्यको अध्यक्षतामा सम्पन्न कार्यक्रममा गाडीधुराका वरिष्ट नागरिक संगठनका सदस्यवर्ग, नवनिर्वाचित पञ्चायत सदस्यगण, गाडीधुरा क्षेत्रका संघ-संस्थाका प्रतिनिधिगण लगायत नवदीप परिवारका सदस्यहरूको उपस्थितिमा रहेको थियो। उपस्थित सबैले सहिद मेजर दुर्गा मल्लको सालिगमा धुप दिप प्रज्वलन गरेर श्रद्धाञ्जलि अर्पण गर्नको साथै विविध कार्यक्रमको साथमा बलिदान दिवस पालन गरियो। अनुप रामुदामुद्वारा सञ्चालित कार्यक्रममा स्वतन्त्रता सेनानी सहिद मेजर दुर्गा मल्लको स्मरण गर्दै एक मिनटको मौन धारण गरे।
यसपछि उपस्थित सबै जनाले सालिगमा फूल-माला चढाएर दुर्गा मल्ललाई श्रद्धाञ्जलि अर्पण गरे। कार्यक्रमलाई सम्बोधन गर्दै वरिष्ट नागरिक डीके विश्वकर्माले सहिदको सम्झानामा नवदीप परिवारको अथक प्रयासले गाडीधुरामा यो भव्य सालिग अनावरण गरेकोमा सबै सदस्यहरूलाई धन्यवाद दिए। यसको साथै यसलाई अनावरण गर्नमा सहयोग गर्ने जीटीए प्रमुख कार्यपाल अनित थापालाई पनि तिनले धन्यावाद दिए। आजको कार्यक्रममा नै हालै सिलगढीको मतिगढामा एकजना नाबालिका छात्राको हत्या भएको घटनाको पनि घोर भर्त्सना जनाउँदै दोषीलाई कडा सजाय हुने पर्ने माग गरे।