गोजमुमो बिमल खेमाले घोषणा गर्‍यो तीन आसनका प्रार्थीहरूको नाम

दार्जिलिङ : अन्ततः सबैको अड्कल-आशंकालाई पूर्ण विराम लगाउँदै गोजमुमो बिमल खेमाले पहाडको तीनवटा विधानसभा आसन दार्जिलिङ, खरसाङ र कालेबुङको लागि आज आफ्नै पार्टीका उम्मेद्वारहरूको नाम घोषणा गर्यो। दार्जिलिङको मालेधुरास्थित पार्टी कार्यालयमा आयोजित एउटा सभामा पार्टी अध्यक्ष बिमल गुरूङले आफ्न दलका प्रार्थीहरूको नाम घोषणा गरे। तिनले गरेको घोषणा अनुसार गोजमुमो बिमल खेमाका उम्मेद्वारहरू दार्जिलिङबाट पीटी ओला, खरसाङबाट नर्बुजी लामा र कालेबुङबाट डा. राम भुजेल सामेल छन्। पार्टीका यी तीन आसनका प्रार्थीहरूमध्ये दार्जिलिङ आसनका पीटी ओला र खरसाङ आसनका नर्बुजी लामालाई अध्यक्ष बिमल गुरूङले नेपाली टोपी अनि खदा लगाइदिएर चुनाउको लागि शुभकामना दिँदै पार्टीको टिकट प्रदान गरे भने कालेबुङका प्रार्थी डा. राम भुजेल कतिपय अति आवश्यक काम परेकोले कोलकाता गएको हुनाले टिकट वितरणको समय तिनी अनुपस्थित थिए। यस अवसरमा पार्टीका महासचिव रोशन गिरीले 34 बुँदे पार्टीको चुनावी घोषणा पत्र पनि पढेर सार्वजनिक गरे। सभालाई पार्टी अध्यक्ष बिमल गुरूङले सम्बोधन गर्दै दार्जिलिङ पहाडको जनताको हित अनि भावी सन्तानको उज्ज्वल भविष्यलाई सम्झेर नै आज यी आफ्ना पार्टीका उम्मेद्वारहरू चयन गरेको बताए। तिनले उम्मेद्वारहरूको सूची सार्वजनिक गर्न अगावै सबै आफ्ना पार्टीका कार्यकर्ताहरूलाई पार्टीले लिएको निर्णयलाई शिरोपर गरेर आ-आफ्नो क्षेत्रका प्रार्थीहरूलाई विपुल मतले जिताउने आहवान पनि गरे। यस अवसरमा तिनले भाजपाको खोइरो खन्दै दार्जिलिङ पहाडप्रति भाजपाको राम्रो सोँच नरहेको दावी गर्दै आज भाजपाले पहाडको तीन आसनमा आफ्नै पार्टीको तर्फबाट उम्मेद्वार घोषणा गरेको कुरा अवगत गराए। भाजपाको गठबन्धनमा रहेको गोरामुमो र क्रामाकपा जस्ता क्षेत्रीय दलहरूलाई भाजपाले कुनै महत्व नदिएको कुरा उक्त निर्णयले स्पष्ट भएको बताउँदै गोरामुमो र क्रामाकपालाई हामी सबै मिलेर पहाडको क्षेत्रीय दलहरूलाई बचाऊँ भनी गुरूङले आहवान गरे। तिनले भाजपाको पहाडमा कुनै अस्तित्व नरहेको दावी गर्दै आफ्नै पार्टीका पूर्व नेताहरूलाई नै भाजपाले खरसाङ, कालेबुङबाट प्रार्थीको रूपमा घोषणा गरेको बताए। तिनले पहाडको यी तीनै आसनमा गोजमुमो प्रार्थीको जीत निश्चित रहेको पनि बताए।