होम आइसोलेसनमा बस्नेहरूको लागि मङपुमा ‘घर दैलो सेवा’ शुरू

मङपु : कोरोनाको दोस्रो लहरको बढ्दो प्रकोपलाई ध्यानमा राखेर मङपु परिवर्तन क्लबले आजदेखि ‘घर दैलो सेवा’ शुरू गरेको छ। हाल कोरोनाको दोस्रो लहरले देशको विभिन्न ठाउँमा धेरैजना मानिसहरू संक्रमित भइरहेका छन् भने धेरैजनाको मृत्यु भइरहेको छ। यसैगरी, यता दार्जिलिङ पहाडी भेकमा पनि संक्रमण बढिरहेकोले गर्दा यता मङ्पु क्षेत्रमा कोरोनाको संक्रमणलाई रोकथाम गर्ने उद्देश्य लिएर मङपु परिवर्तन क्लबले आजदेखि ‘घर दैलो सेवा’ शुरू गरेको क्लबका संस्थापक सदस्य दावा शेर्पाले बताए। कोरोना संक्रमित भएर होम आइसोलेसनमा बसेकाहरूलाई इलाकाका मानिसहरूले सेवा पुर्‍याउन नसक्ने भएकोले मङपु परिवर्तन क्लबले घर-दैलो सेवा पुर्‍याउने सोच राखेर उक्त पहल गरेको तिनले बताए। विशेष होम आइसोलेशनमा बसेका कोरोना संक्रमितहरूलाई सहयोग गर्ने उद्देश्य लिएर नै क्लबले मङपु क्षेत्रमा आजदेखि घर-दैलो अभियान शुरू गरेको छिरिङ तामाङले बताए।