सिलगढीमा युवतीको फोन छिनताई गर्ने युवक पक्राउ

सिलगढी: युवतीको हातबाट फोन थुतेर सुइँकुच्चा ठोकेका युवकलाई पुलिसले पक्रा गरेपछि आज सिलगढी अदालतमा पेश गर्यो। पक्रा परेका युवकको नाम रितम दास बताइएको छ। तिनी डाबग्राम निवासी हुन्। घटनाक्रम अनुसार गत 30 जनवरीको राति लगभग 9 बजी सिटी सेन्टरमा काम गर्ने एउटी युवती कामबाट समर नगरस्थित घर फर्किरहेको समय गणेश घोष कोलनी नजिक सर्किट हाउस छेउ स्कुटीमा सवार एकजना युवकले तिनको हातबाट फोन थुतेर सुइँकुच्चा ठोकेको थियो। घटनापछि युवतीले थानामा अभियोग दर्ता गरेपछि अभियोगको आधारमा प्रधान नगर थाना पुलिसले सीसीटीभी क्यामाराको सहयोगमा छिनताई अवधि प्रयोग गरेको स्कुटीको पत्तो लगाएपछि उक्त युवक डाबग्राम निवासी रहेको थाहा पाए। यसपछि पुलिसले चोरी गरेको फोन सहित युवकलाई पक्राउ गरेको छ।