आगामी 10 मार्चको ब्रिगेड सभालाई सफल बनाउनको लागि राजगञ्जमा तृणमूलको सभा

राजगञ्ज : आगामी 10 मार्चको ब्रिगेडमा ‘जनगर्जन सभा‘-लाई सफल बनाउने उद्देश्य लिएर तृणमूल कङ्ग्रेसले राजगञ्जको श्री संघ क्लबको प्राङ्गणमा आज एउटा सभाको आयोजना गर्यो। उक्त सभामा तृणमूल कङ्ग्रेसका प्रवक्ता अरूप चक्रवर्ती मुख्य रूपमा उपस्थित थिए। सभामा रजगञ्जको विभिन्न इलाकाबाट धेरैजना कार्यकर्ता तथा समर्थकहरू उपस्थित थिए। बङ्गालप्रति केन्द्र सरकारको उपेक्षाको विरोधमा तृणमूल कङ्ग्रेसले ब्रिगेड समावेशको आहवान गरेको हो। उक्त ब्रिगेड सभाको नाम ‘जनगर्जन सभा‘ ​राखिएको छ। उक्त सभामा बङ्गाललाई केन्द्रले वञ्चित गरेको, 100 दिनको काम, आवास योजना, सडक र विविध जनकल्याणकारी परियोजनाहरूको रुपियाँ बन्द गरेको विरुद्ध विरोध प्रदर्शन गरिने भएको छ। यस अवसरमा राजगञ्जका विधायक खगेश्वर राय, जिल्ला परिषदकी सभाधिपति कृष्णा राय बर्मन, आईएनटीटीयुसी जिल्ला अध्यक्ष तपन दे, तृणमूल कङ्ग्रेसको राजगञ्ज ब्लक अध्यक्ष अरिन्दम ब्यानर्जी, सुनील सरकार लगायत अन्य उपस्थित थिए।