एकीकृत कर्मचारी सङ्गठनको मिरिकमा सांगठनिक सभा

मिरिक : एकीकृत कर्मचारी सङ्गठन मिरिक महकुमा समितिको आज एउटा साङ्गठनिक सभा महकुमा अन्तर्गत विभिन्न युनिटहरूलाई सहभागी गराएर सम्पन्न गर्यो। एकीकृत कर्मचारी सङ्गठनले दिपावली (तिहार)-पछि स्थायीकरणको दोस्रो चरणको आन्दोलनलाई अघि बढाउने रणनीतिको केन्द्रीय समिति, मिरिक, खरसाङ महकुमा समिति तथा कालेबुङ जिल्ला समितिको समन्वय सभा बसेर तयार गरी घोषणा गर्ने भएको छ। सभापछि यसबारे एकीकृत कर्मचारी सङ्गठन अध्यक्ष लिलन थापाले जानकारी दिँदै आज बसेको सभाले ग्रहण गरेको प्रस्तावहरू केन्द्रीय समितिमा पठाउने बताए। सभामा प्रायः सबै युनिट प्रतिनिधिबाट सङ्गठन मुक्त हुने सुझाउ आयो। कुनै दलको भातृ सङ्गठनको रूपमा रहनु नहुने सुझाउ आएकोले सभाले प्रस्तुत सुझाउरूपी प्रस्तावलाई ग्रहण गरेको छ। अब दिपावालीपछि हुने सभाले ठोस निर्णय लिने अनि भावी रणनीतिको घोषणा गर्ने तिनले बताए। मिरिकको एउटा होटलको सभागृहमा बसेको उक्त सभामा प्रत्येक युनिटबाट एकजना प्रतिनिधिले सुझाउ राखेका थिए। यसमाथि प्रकाश पार्दै सङ्गठनका मिरिक महकुमा प्रवक्ता ज्ञानेन्द्र गुरुङ्गले सभा पछि भने हामीले प्रत्येक युनिटको सभा सम्पन्न गरेपछि महकुमा समितिको सभा सम्पन्न गरेका हौं । एकीकृत कर्मचारी सङ्गठनको एक सुत्रीय माग स्थायीकरण रहेको अनि यसको लागि सङ्गठनले गरेको आन्दोलन अहिले स्थगित गरेको सङ्गठनका मिरिक महकुमा प्रवक्ता ज्ञानेन्द्र गुरुङले बताए। तिनले सभाको उद्देश्य र औचित्यमाथि पनि प्रकाश पारे।