अलिपुरद्वारमा बाइसनको हमलामा दुईजना घाइते

अलिपुरद्वार : अलिपुरद्वार 2 नम्बर ब्लकको चेपानी इलाकामा बाइसनको हमलामा दुईजना व्यक्ति घाइते भएका छन्। घाइतेहरूमा रेणुबाला देवनाथ र महितोष राय सामेल छन्। चेपानी गाउँ नजिक बक्सा बाघ परियोजनाको छिपड़ा जङ्गल छ। आज बिहानै एउटा बाइसन जङ्गलबाट निस्केपछि आवासीय इलाकामा पसेर बिहानको भ्रमणमा निस्केकी 75 वर्षीय रेणुबाला देवनाथ नाम गरेकी एउटी वृद्धामाथि हमला गर्दा तिनी घाइते भएकी छन्। यसपछि उक्त बाइसनले महितोष रायलाई हमला गर्दा तिनी पनि गम्भीर रूपमा घाइते भएको बताइएको छ। दुवैलाई गम्भीर अवस्थामा उद्धार गरेर अलिपुरद्वार जिल्ला अस्पतालमा पुर्‍याइएपछि हाल तिनीहरूको त्यहाँ उपचार चलिरहेको छ। घटनाको खबर पाएर शामुकतला पुलिस र वनकर्मी घटनास्थलमा पुगे।