अनित थापा दुईदिने भ्रमणमा आइपुगे मिरिक

मिरिक : भारतीय गोर्खा प्रजातान्त्रिक मोर्चा अध्यक्ष अनित थापा आज दुई दिने भ्रमणमा मिरिक आइपुगेका छन्। मिरिक भ्रमण अवधि तिनले सांगठनिक गतिविधिलाई अझ तीव्र पार्नको साथै पार्टी कार्यकर्ताहरूसित भेट गरेर रणनीति तयार गर्ने पार्टी सूत्रले जनाएको छ। मिरिकमा तिनले यहाँको 9 वटै वार्ड मिरिक नगरपालिका चुनाउमा आफ्नो पार्टीले जित्ने दावी गरे। जीटीएको सन्दर्भमा तिनले भने, केन्द्र र राज्य सरकारले मिलेर संवैधानिक रूपमा दिएको व्यवस्था हो जीटीए। संविधानभन्दा ठुलो हामी होइनौँ। तिनले पहाडमा शिक्षा व्यवस्था ध्वस्त रहेको बताउँदै यहाँ रिजनल एसएससी लागू गरेर अन्तर्वार्ता मार्फत् नोकरी दिइनुपर्ने, निष्क्रिय रहेको पहाडको इम्प्लोइमेन्ट एक्सचेन्जलाई पुनः सक्रिय बनाउनुपर्ने, पञ्चायत चुनाउ हुनुपर्ने बताए। तिनले हिल युनिर्भसिटी पहाडको निम्ति ठुलो उपलब्धि रहेको दावी गर्दै वन क्षेत्रमा रहेको जमिनको पनि पर्जापट्टाको काम फत्ते भइसकेको बताए।