अवैध रूपमा नेपाल लगिरहेको धेरै लुगाफाटासहित एकजना पक्राउ

खोरीबारी : एसएसबी 41औँ बटालियनको कदोमनी जोत तथा जोरलाजोत क्याम्पका जवानहरूले संयुक्त नाका चेकिङ अवधि अवैध रूपमा नेपाल भित्र्याइरहेको धेरै मात्रामा लुगाफाटा जफत गर्नको साथै एकजना युवकलाई पक्राउ गरेको छ। प्राप्त जानकारी अनुसार नाका चेकिङ अवधि पिलर नम्बर 94 नजिक केही मानिसहरूले ब्यागमा केही समानहरू अवैध रूपमा नेपाल भित्र्याइरहेको देखेपछि सीमामा एसएसबी जवानहरूले रोक्दा ब्याग त्यहीँ छोडेर तिनीहरू नेपालतर्फ भागे। यस अवधि एसएसबीका जवानहरूले सन्त राय नाम गरेको एकजना युवकलाई पक्रिन सफल भए। पक्रा परेका युवकको ब्याग छानबीन गर्दा धेरै मात्रामा लुगाफाटा उद्धार गरेको छ भने जफत गरेको लुगाफाटाको अनुमानित बजार मूल्य लगभग 1 लाख 38 हजार रुपियाँ रहेको बताइएको छ। जवानहरूले आवश्यक कार्वाहीपछि जफत गरेको लुगाफाटासहित उक्त युवकलाई पानीट्याङ्की कस्टमलाई सुम्पिदिएको छ।