बाघडुग्रामा आग्नेयास्त्र र कारतूससहित युवक पक्राउ

सिलगढी, 20 नोभेम्बर (निसं): बाघडुग्रामा आग्नेयास्त्र र कारतूससहित एकजना युवक पक्रा परेको छ। बाघडुग्रा थाना पुलिसले सादा पोशाकमा मङ्गलबार साँझ बाघडुग्राको जङ्गली बाबा मोड इलाकाबाट युवकलाई पक्राउ गरेको छ। पक्राउ परेका आरोपीको नाम मोहम्मद कामिरुल हो। तिनी फूलबारीको जोयदेवभिटा निवासी हुन्।
प्राप्त जानकारी अनुसार युवक मङ्गलबार बिहारबाट नक्सलबारीको सडक हुँदै बाघडुग्रा आइरहेका थिए। बाघडुग्रा थाना पुलिसले गोप्य सूचना पाएर बाघडुग्राको जङ्गली बाबा मोड इलाकामा अभियान चलाएर युवकलाई रोकेर छानबिन गर्दा एउटा आग्नेयास्त्र र ताजा कारतूस फेला पऱ्यो। त्यसपछि पुलिसले युवकलाई पक्राउ गरेका छन्। आरोपीलाई आज सिलगढी महकुमा अदालतमा पेश गरियो। पुलिसले सम्पूर्ण घटनाको जाँच गरिरहेको छ।