बकाया वेतन लगायत विविध माग गर्दै सिलगढी गभर्मेन्ट पोलिटेक्निक कलेजका अस्थायी सुरक्षाकर्मीहरू हडतालमा

सिलगढी : बकाया वेतन लगायत विविध मागलाई लिएर सिलगढी गभर्मेन्ट पोलिटेक्निक कलेजका अस्थायी सुरक्षाकर्मीहरू हडतालमा बसेका छन्। प्राप्त जानकारी अनुसार यसभन्दा अघि पनि सिलगढी गभर्मेन्ट पोलिटेक्निक कलेजका अस्थायी सुरक्षाकर्मीहरूले बारम्बार आन्दोलन गरे तापनि तिनीहरूको माग पुरा नभएपछि आजदेखि हडतालमा बसेका छन्। यस अवधि तिनीहरूले कलेजका प्रिन्सिपललाई कलेजभित्र प्रवेश गर्न दिएनन्। आन्दोलनकारीहरूको भनाइ अनुसार राज्यको गभर्मेन्ट पोलिटेक्निक कलेजमा ग्रुप डी-मा कार्यरत अस्थायी कर्मचारीहरूको धेरै दिन अघिदेखि वेतन वृद्धि नगरेको साथै बकाया वेतन समेत पाएका छैनन्। यस सम्बन्धमा बारम्बार कलेजका प्रिन्सिपल लगायत सम्बन्धित विभिन्न विभागमा अवगत गराउँदै ज्ञापन पत्र समेत चढाइसके तापनि कलेज कर्तृपक्षले हालसम्म कुनै पहल गरेको छैन। यसैले गर्दा बाध्य भएर आज अस्थायी कर्मचारीहरूले आफूहरूको माग पुरा गरिनुपर्ने माग गर्दै धरना प्रदर्शन गरेको बताइएको छ। माग पुरा नभएसम्म हडताल जारी राख्ने आन्दोलनकारीहरूले चेताउनी दिएका छन्।