पानीघट्टा : एमएन तराई अन्तर्गत पर्ने बेलगाछी चियाबारीमा यहाँको पुलिसद्वारा आज एउटा जागरूक अभियान चलाइयो। पानीघट्टा पुलिस बुथको आयोजनामा यहाँको बड़ा लाइन बेलगाछी चियाबारीमा स्थानीय मानिसहरूलाई चेलीबेटी बेच-बिखन, मदपान सेवन, ब्याङ्कमा हुने धाँधली, बाल श्रमलगायत अन्य असामाजिक व्यवस्था तथा कुरीतिहरूबारे अवगत गराइयो।
यस अवसरमा यहाँका विभिन्न क्लबहरूलाई क्रिकेट बल-ब्याट, फुटबल तथा भलिबल वितरण गरियो। यसबाहेक आवश्यकमन्द तथा गरिब परिवारका सदस्यहरूलाई पुलिसको तर्फबाट कम्बल पनि वितरण गरियो। यस जागरूकता कार्यक्रममा स्थानीय ग्राम पञ्चायत सदस्य जोकिम केरकटा, चियाकमानका प्रबन्धक, समाजसेवी विशाल तामाङ, पृथिवीराज गोयललगायत पुलिस अधिकारीहरू प्रमुख रूपमा उपस्थित थिए।
