विधानसभा चुनाउलाई केन्द्र गरेर जलपाईगढीमा तृणमूलको अनुसूचित जाति संकल्प यात्रा

जलपाईगढी : आउँदो विधानसभा चुनाउलाई केन्द्र गरेर अनुसूचित जातिको मतदान गुटमुट्याउने उद्देश्य लिएर तृणमूल कांग्रेसले सदर विधानसभाको विभिन्न इलाकामा प्रचारको लागि अनुसूचित जाति संकल्प यात्रा शुरू गरेको छ। प्राप्त जानकारीअनुसार जलपाईगढी सदर विधानसभालाई केन्द्र गरेर तृणमूल को-अर्डिनेटर डा. प्रदीप कुमार बर्माको कार्यालयबाट उक्त अनुसूचित जाति संकल्प यात्राको ट्याबलोरको जिल्ला सभापति कृष्ण कुमार कल्याणी तथा को-अर्डिनेटर डा. प्रदीप कुमार बर्माले उद्घाटन गरे। उक्त सुसज्जित ट्याबलोरमा 10 जना स्वयम् सेवक सदर विधानसभा केन्द्रको विभिन्न ठाउँका अनुसूचित जातिका मानिसहरूसमक्ष गएर प्रचार गर्नेछन्। यसको साथै राज्य सरकारविरुद्ध तिनीहरूको कुनै असन्तुष्टि रहे स्वयम् सेवकहरूले सो पार्टीसमक्ष पुर्‍याउने बताइएको छ। सदर विधानसभा लगायत जिल्लाको 7 वटा विधानसभा केन्द्रहरूमा यस प्रकारको ट्‍याबलरले प्रचार गर्ने कृष्ण कुमार कल्याणीले बताए। जलपाईगढी जिल्ला लगायत सदर विधानसभा इलाकाको अनुसूचित जातिको लागि राज्यकी मुख्यमन्त्रीले धेरै विकासमूलक कार्य गरेको साथै उक्त कार्यहरू साधारण मानिसहरू समक्ष पुर्‍याउने उद्देश्यले उक्त संकल्प यात्रा गरेको को-अर्डिनेटर डा. प्रदीप कुमार बर्माले बताए।