विद्यार्थीहरूको विविध समस्यालाई लिएर एसएफआई-द्वारा प्राचार्यलाई ज्ञापन पत्र चढाइने

सिलगढी : स्कुल, कलेज तथा विश्वविद्यालयको विभिन्न शुल्क (फी) माफ गरिनुपर्ने मागमा भारतीय छात्र फेडरेशनले आन्दोलन गरिरहेको छ। यसको साथै कोरोना महामारीको समयमा कलेज भर्ना पनि निःशुल्क गरिनुपर्ने तिनीहरूले माग गरेका छन्। प्राप्त जानकारीअनुसार गत 13 अगस्तको दिन राज्य सरकारले कलेज भर्ना शुल्क तथा भर्नाको आवेदन शुल्कमा छुट दिइने निर्णय लिए तापनि 13 अगस्तभन्दा अघि धेरैजना विद्यार्थीहरूले कलेजको फारम बुझाइसकेका थिए। यसैले रुपियाँ दिएर फारम भर्ने विद्यार्थीहरूको रुपियाँ फिर्ता गरिदिनुपर्ने भारतीय छात्र फेडरेसन दार्जिलिङ जिल्ला कमिटीको तर्फबाट जिल्ला सचिव शङ्कर मजुमदारले माग गरेका छन्। यसबाहेक विश्वविद्यालयको गेम्स रेजिस्ट्रेसन फी, राज्य सरकारको अधीनमा रहेको ट्युसन फी लगायत अन्य केही शुल्कहरूमा छुट दिनुपर्ने पनि तिनीहरूको माग रहेको छ। संगठनका जिल्ला सभापति सागर शर्माले बताएअनुसार 25 अगस्तदेखि तिनीहरूले विभिन्न कलेजहरूमा गएर उक्त माग गर्दै प्राचार्यलाई ज्ञापन पत्र सुम्पिने भएको छ। यसबाहेक चियाकमानका गरिब विद्यार्थीहरूलाई पनि राज्य सरकारले सहयोग पुर्‍याउनुपर्ने तिनीहरूले माग गरेका छन्।