बिमलपन्थी गोजमुमो तीनधारे खण्ड समितिद्वारा चुनभट्टी क्षेत्रमा सेनिटाइज

खरसाङ: खरसाङ खण्ड अन्तर्गत तीनधारे- महानदी समष्टीको चुनभट्टीमा कोरोना संक्रमण भएर दुईजनाको मृत्यु भएको छ। तर मृतक दुवैजनाको अन्य बिमारीहरू पनि रहेको कारणले निधन भएको जानकारी प्राप्त भएको छ। चुनभट्टीको दुईजनामध्ये एकजना उत्तर बंगाल मेडिकल कलेजमा निधन भएको र अर्को एकजनाको खरसाङ अस्पतालमा निधन भएको जानकारी प्राप्त भएको छ। यस विषयमा सुकना खण्ड स्वास्थ्य अधिकारी डा. हसिबुल मल्लिकसित जान्न चाहँदा तिनले चुनभट्टीको दुईजना हिजो राति निधन भएको हो तर दुवैको अन्य बिमारीहरू पनि भएकोले एकजनाको उत्तर बंगाल मेडिकल कलेजमा र अर्को एकजनाको खरसाङ अस्पतालमा निधन भएको बताएका छन्। चुनभट्टीको उक्त क्षेत्रमा बिमलपन्थी गोजमुमो तीनधारे खण्ड समितिको आयोजनामा आज सल्लाहकार तिलक तामाङ र युवा मोर्चाका केन्द्रीय सदस्य योगराज प्रधानको नेतृत्त्वमा चुनभट्टी क्षेत्रमा सेनिटाइज गरियो।