चीनमा तस्करी गर्न अगावै चितुवाको छाला सहित 1 जना पक्राउ

सिलगढी : चीनमा तस्करी गर्न अगावै वन विभागले चितुवाको छाला सहित एकजना व्यक्तिलाई पक्राउ गरेपछि आज जलपाईगढी अदालतमा पेश गर्यो। पक्रा परेका व्यक्ति जलपाईगढी जिल्लाको चालसा निवासी 33 वर्षीय बेलाल अलीको रूपमा चिन्हित गरिएको छ। गोप्य सूचनाको आधारमा हिजो अपरान्ह बैकुण्ठपुर वन विभागको सालुगढा रेञ्जका वन कर्मीहरूले उदलाबारी इलाकामा अभियान चलाएर एउटा वाहनलाई रोकेर छानबीन गर्दा चितुवाको छाला उद्धार गर्नको साथै एकजना व्यक्तिलाई पक्राउ गरेको बताइएको छ। वन विभाग सूत्रले दिएको जानकारी अनुसार उद्धार गरेको चितुवाको छाला 80 सेन्टिमिटर लामो र 30 सेन्टिमिटर चौडाइ रहेको छ। उक्त चितुवाको छाला मालबजार हुँदै चीनमा तस्करी गर्ने योजना रहेको थियो। उक्त घटनामा अन्य व्यक्तिहरू पनि संलग्न हुनसक्ने आशंकामा वन विभागले जाँच शुरू गरेको छ।