चिया दोकानको आडमा अवैध रम-रक्सी बिक्री, एकजना दोकाने पक्राउ

सिलगढी, 30 अक्टोबर (निसं): चिया दोकानको आडमा अवैध रम-रक्सीको व्यवसाय गरेको एनजेपी थाना पुलिसले खुलासा गरेको छ। चिया दोकानबाट धेरै मात्रामा देशी-विदेशी रम-रक्सीसहित एकजना व्यक्तिलाई पक्राउ गरेको छ। पक्रा पर्ने व्यक्तिको नाम शंकर महतो हो।
जानकारी अनुसार, चिया दोकानको आडमा धेरै समयदेखि अवैध रम-रक्सीको व्यवसाय चलाइरहेको गोप्य सुइँको थाहा पाएपछि एनजेपी थाना पुलिसले डीएस कलोनी क्षेत्रको दोकानमा नजर राखेका थिए। त्यसपछि, मंगलबार एकजना पुलिस सादा पोशाकमा ग्राहकको रूपमा चिया दोकानमा पुगेर रम-रक्सी बेच्ने व्यवसायी शंकर महतोलाई रंगे हात पक्राउ गरे।
उक्त चियाको दोकानबाट पुलिसले धेरै मात्रामा देशी-विदेशी रम-रक्सी उद्धार गरेको बताइएको छ। आरोपीलाई बुधबार जलपाईगढी अदालतमा पेश गरियो। पुलिसले सम्पूर्ण घटनाको जाँच गरिरहेको छ।