चोरी भएको बाइक 12 घण्टामैं भारत-नेपाल सीमाबाट उद्धार, भागे चोर

सिलगढी, 29 नोभेम्बर (निसं): मतिगढा पुलिसले सादा पोशाकमा चोरी भएको बाइक 12 घण्टाको अवधिमा नै उद्धार गरेको छ। प्राप्त जानकारी अनुसार, जुवेल नामक एकजना युवक हलरमाथा क्षेत्रमा एउटा निजी कम्पनीमा भीडियोग्राफीको काम गर्दै आइरहेको छ। बुधवार तिनी आफ्नो बाइक लिएर हलरमाथा आफ्नो काममा गएका थिए। राति उनले आफ्नो बाइक चोरी भएको थाहा पाए। त्यसपछि उनले मतिगढा थानामा एउटा लिखित अभियोग दर्ता गराए। अभियोगको आधारमा मतिगढा थाना पुलिसले सादा पोशाकमा छानबिन शुरू गरेपछि उक्त हलरमाथाबाट चोरी भएको बाइक इन्डो-नेपाल सीमा नजिक देखिएको गोप्य सूत्रमार्फत थाहा पाए। यस जानकारीको आधारमा मतिगढा पुलिसले अभियान चलाएर इन्डो नेपाल सीमा पार गर्न अगावै चोरी भएको बाइक उद्धार गर्न सफल भयो, तर चोर पुलिसको हातबाट भाग्न सफल भयो। यसैबीच, चोरी भएको बाइक उद्धार भएपछि जुवेल निक्कै खुशी छन्। मतिगढा थाना पुलिसले घटनाको जाँच जारी राखेको छ।