सिलगढी : एनजेपी थाना पुलिसले एउटा ट्रक चोरी गरेको आरोपमा एकजना व्यक्तिलाई पक्राउ गरेको छ। पक्रा परेका युवक मतिगढा निवासी समीर यादव उर्फ भानडुरको रूपमा चिन्हित गरिएको छ। प्राप्त जानकारीअनुसार गत शनिबार सपिबर रहमानले ट्रक चोरी भएकोबारे एनजेपी थानामा एउटा अभियोग दर्ता गरेका थिए। अभियोगको आधारमा पुलिसले 12 घण्टाको अवधिमै मतिगढाबाट एकजना व्यक्तिलाई पक्राउ गर्नको साथै चोरी गरिएको ट्रक पनि उद्धार गरेको बताइएको छ।
स्मरण रहोस्, केही दिन अघि फुलबारीमा राखिएको बोल्डर बोक्ने वाहनको ब्याट्री चोरी गरेको आरोपमा पुलिसले उक्त युवकलाई पक्राउ गरेको थियो। स्थानीय मानिसहरूले बताएअनुसार बोल्डर बोकेको वाहन सीमाना पारि जानको लागि फुलबारीको सडकमा धेरै समयसम्म पर्खिरहनु परेकोले वाहन चालक तथा सरकारी चाकलहरूले बाध्य भएर वाहन त्यहीँ छोडेर जाने गर्दछन्। यसैको फाइदा उठाएर केही दुष्कृतिहरूले यस प्रकारको कार्य गर्ने गरेको तिनीहरूले बताए। आरोपी युवकलाई आज जलपाईगढी अदालतमा पेश गरियो।