चोरीको साइकल सहित एकजना आरोपी पक्राउ

सिलगढी, 21 दिसम्बर: सिलगढीको प्रधाननगर थाना पुलिसले चोरीको साइकलसहित एकजना आरोपीलाई पक्राउ गरेको छ। आरोपीको नाम अजीत सहनी हो। जानकारी अनुसार, 17 तारिखको राति चम्पासारी अञ्चलस्थित एउटा अपार्टमेन्टबाट साइकल चोरी भएको थियो। यस घटनाबारे 19 तारिख प्रधाननगर थानामा उजुरी दर्ता गरेको थियो। उजुरीको आधारमा जाँचमा जुटेको प्रधाननगर थाना पुलिसले सादा पोशाकमा गोप्य स्रोतको मद्दतले हिजो चम्पासारीबाट आरोपीलाई पक्राउ गरेको छ। यसको साथै, पुलिसले आरोपीको बयानको आधारमा सिलगढी रेगुलेटेड मार्केटबाट चोरी गरिएको साइकल पनि उद्धार गरेको छ। आज आरोपीलाई सिलगढी अदालतमा पेश गरियो। पुलिसले थप छानबिन गरिरहेको छ।