चुनाउ आयोगको फसेलाविरुद्ध गौतम देवद्वारा क्षोभ प्रकट

सिलगढी : चुनाउ प्रचारको लागि तृणमूल कङ्ग्रेसले कम्ती समय पाओस् भनेर नै चुनाउ आयोगले चुनाउ प्रचारको अवधि 24 घण्टा कम्ती गरिदिएको छ। आज एउटा पत्रकार सम्मेलनको आयोजना गरेर गौतम देवले चुनाउ आयोगविरुद्ध यस प्रकारको मन्तव्य व्यक्त गरे। तिनले बताएअनुसार अमित शाह र दिलीप घोष लगायत भाजपाका शीर्ष नेताहरूले आफ्नो चुनाउ प्रचार गरिसकेका छन् भने चुनाउ प्रचारको अवधि 24 घण्टा कम्ती गरिदिएकोले तृणमूल कङ्ग्रेस समस्यामा परेको छ। अर्कोतिर, चुनाउ आयोगले 24 घण्टाको लागि तृणमूल नेत्री ममता ब्यानर्जीको चुनाउ प्रचारमा रोक लगाएको छ। चुनाउ आयोगको उक्त निर्णयले गर्दा भाजपालाई सुविधा भइरहेको गौतम देवले बताए। चुनाउ आयोगमाथि कटाक्ष कस्दै तिनले भने, शीतलकुचीको घटनालाई लिएर भाजपाका नेताहरूको विवादित बयानविरुद्ध चुनाउ आयोग किन कुनै कार्वाही गर्दैन।