कुचबिहार बार एसोसिएसनका वकीलहरूसित भेटे मन्त्री उदयन गुहाले

कुचबिहार : केन्द्रीय गृह राज्य मन्त्री निशिथ प्रामाणिकपछि उत्तर बंगाल विकास मन्त्री उदयन गुहाले आज कुचबिहार बार एसोसिएसन गएर त्यहाँका वकीलहरूसित भेट गरे। तिनी आज अपरान्ह कुचबिहार बार एसोसिएसन पुगेर त्यहाँका वकीलहरूसित भेट गर्नको साथै तिनीहरूको विविध समस्याहरू सुनेर ती समस्याहरू समाधान गरिदिने आश्वासन पनि दिएका छन्। लोकसभा चुनाउअघि एक महीनाको अवधिमै दुईजना मन्त्रीहरू बार एसोसिएसनमा गएर वकीलहरूसित भेट गरेको विषयलाई लिएर राजनीतिक महलमा हङ्गामा मच्चिएको छ। तथापि, उत्तर बंगाल विकास मन्त्री उदयन गुहाले यस विषयमा कुनै मन्तव्य दिन चाहेनन्। तिनले भने, बार एसोसिएसनमा गएर वकीलहरूसित भेट गर्ने पूर्व नियोजित कार्यक्रम रहेको थियो। वकीलहरूलाई बस्ने ठाउँको समस्या भइरहेकोले गर्दा उत्तरबंग विकास विभागबाट चाँडै यसको व्यवस्था गरिदिने तिनले बताए।