कोरोना संक्रमितहरूको उपचारको लागि सिक्किम आइपुग्यो 144 वटा अक्सिजन सिलेन्डर  

गान्तोक : छिमेकी राज्य सिक्किममा पनि दिनहुँ कोरोनाले मर्नेहरूको सङ्ख्या बढ्दै जानको साथै संक्रमितहरूको सङ्ख्यामा पनि लगातार वृद्धि भइरहेको छ। यसैले गर्दा कोरोना संक्रमितहरूको उपचारको लागि सिक्किम राज्यलाई केन्द्र सरकारले 144 वटा अक्सिजन सिलेन्डर प्रदान गरेको छ। यी सिलेन्डरहरू आईएएफ कार्गो एयर क्राफ्ट मार्फत् बाघडुग्रा एयरपोर्ट हुँदै आज सिक्किम ल्याइपुर्‍याएको छ। सिक्किम राज्यमा गत 24 घण्टाको अवधिमा 6 जनाको मृत्यु भएको छ भने 232 नयाँ संक्रमित मामिलाहरू देखापरेको जानकारी प्राप्त भएको छ। यसैगरी, होम आइसोलेसन लगायत अस्पतालमा उपचार गरेपछि मोठ 7 हजार 4 सय 46 जना निको भइसकेको छ भने हालसम्ममा कोरोना संक्रमितहरू सङ्ख्या 10 हजार 8 सय 55 जना पुगेको छ। यस्तो परिस्थितिलाई ध्यानमा राखेर नै आज मुख्यमन्त्री पीएस गोलेको अध्यक्षतामा सम्पन्न भएको एउटा महत्वपूर्ण बैठकमा आउँदो 17 मईदेखि एक सातासम्मको लागि राज्यभरि सम्पूर्ण लकडाउनको घोषणा गरिएको छ। तथापि, लकडाउन अवधि अति आवश्यक परिसेवा अनि औषधी पसलहरूलाई छुट दिएको छ।