डाबग्राम-फुलबारीका अलोक सेनले भाजपा छोडे, निर्दलीय प्रार्थीको रूपमा चुनाउ लड्ने

सिलगढी : डाबग्राम-फुलबारी विधानसभा क्षेत्रमा अलोक सेनले भाजपा पार्टी छोडेर आउँदो विधानसभा चुनाउमा निर्दलीय उम्मेद्वारको रूपमा चुनाउ लड्ने भएका छन्। हाल, तिनले नामाङ्कन पत्र लिएका छन्। सिलगढीमा आज एउटा पत्रकार सम्मेलनको आयोजना गरेर अलोक सेन यसबारे जानकारी दिएका छन्। भाजपाले मूल नेताहरूलाई महत्व नदिएको आरोप लगाउँदै तिनले तृणमूल कङ्ग्रेस तथा अन्य पार्टीहरू छोड़ेर भाजपामा सामेल हुनेहरूलाई टिकट दिइरहेको बताए। तिनले यसको लागि मुकुल रायलाई दोषी ठहराएका छन्। तिनले लगाएको आरोप अनुसार मुकुल रायले केवल ती मानिसहरूलाई मात्र पार्टीको टिकट दिएका छन् जो बाहिरबाट आएका अथवा तिनको सम्पर्कमा रहेका छन्। मुकुल रायको नजिकैको रहेकोले गर्दा नै डाबग्राम-फुलबारी विधानसभा क्षेत्रमा शिखा च्याटर्जीले पार्टीको टिकट पाएको तिनले बताए। आफू निर्दलीय उम्मेद्वारको रूपमा चुनाउमा खड़ा भएका हुन् भने तिनको मुख्य प्रतिद्वन्द्वी तृणमूल रहेको बताउँदै राज्यमा भाजपाले सत्ता गठन गर्न सक्ने दावी गरे। राज्यभरिमै लगभग 170 जना असन्तुष्ट भाजपा नेताहरू निर्दलीय उम्मेद्वारको रूपमा विधानसभा चुनाउमा खड़ा भइरहेका छन्।