दार्जिलिङमा नयाँ पार्टी दार्जिलिङ डेमोक्रेटिभ फोरम-को उदय

दार्जिलिङ : दार्जिलिङमा आउँदो विधानसभा चुनाउलाई लिएर विभिन्न राजनैतिक दलहरू सलबलाइरहेको घटनाक्रमबीच आज दार्जिलिङमा एउटा नयाँ राजनैतिक पार्टीको उदय भएको छ। दार्जिलिङ डेमोक्रेटिभ फोरम नाम गरेको राजनैतिक पार्टीको आधिकारिक घोषणा यसको संस्थापक संयोजक एसपी शर्माले दार्जिलिङमा गरेका छन्। उक्त नयाँ पार्टीले आउँदो 2021-को चुनाउ लड्ने समेत जानकारी दिएको छ। पार्टीले विशेष गरेर क्षेत्रीय मुद्दाहरूलाई लिएर अघि बढ्ने यसको साथै आगामी विधानसभा चुनाउमा पनि प्रमुख मुद्दाहरू स्थानीय मुद्दाहरूलाई नै प्रमुखता दिइने बताइएको छ। आज एसपी शर्माले दार्जिलिङको प्रेस क्लबमा पत्रकारहरूलाई सम्बोधन गर्दै भाजपा, तृणमूल कांग्रेस जस्ता दलहरूले दार्जिलिङका मानिसहरूको निम्ति कुनै क्षेत्रीय मुद्दाहरूको पहल नगरेकोले गर्दा नै युवा जमातहरू मिलेर चुनाउ लड्ने निर्णय लिएको बताए।