दीपावली अघि लाखौँ रुपियाँको प्रतिबन्धित पटेका उद्धार

सिलगढी (निसं): दीपावलीअघि मतिगढा थाना पुलिसले अधिक मात्रामा प्रतिबन्धित पटेका जफत गरेको छ। तथापि, उक्त घटनामा कसैलाई पक्राउ गरिएको छैन। प्राप्त जानकारी अनुसार आज मतिगढा थाना पुलिसले गोप्य सूचनाको आधारमा मतिगढा हाट संलग्न इलाकाको एउटा घरमा अभियान चलाएर अधिक मात्रामा प्रतिबन्धित पटेका उद्धार गरेको बताइएको छ। जफत गरेको पटेकाको अनुमानित बजार मूल्य 7 लाख रुपियाँ तोकेको छ। मतिगढा हाट संलग्न उक्त घरमा दीपावलीको लागि बाहिरबाट अधिक मात्रामा प्रतिबन्धित पटेका ल्याएर लुकाएर राखेको थियो। पुलिसले घटनाको जाँच शुरू गरेको छ।