फुलबारीमा रक्ताम्मे अवस्थामा सुरक्षा गार्डको शव उद्धार

सिलगढी : फुलबारीमा सुरक्षा गार्डको रक्ताम्मे अवस्थामा शव उद्धार भएको छ। मृतक व्यक्ति कुचबिहारको फालाकाटा इलाका निवासी दीपङ्कर दासको रूपमा चिन्हित गरिएको छ। तिनले एउटा गैर सरकारी सिक्युरिटी संस्थाको पहलमा फुलबारी 2 नम्बर अञ्चलको लक्ष्मीजोत इलाकामा एउटा खाली जमिनको देखरेखको काम गर्दथे। हिजो राति एनजेपी थाना पुलिसले उक्त इलाकाबाट रक्ताम्मे अवस्थामा तिनको शव उद्धार गरेको बताइएको छ। मृतक व्यक्तिको शरीरको विभिन्न भागमा धारिलो हतियारले प्रहार गरेको निशान रहेको छ। मृतकको परिवारका सदस्यहरूले थानामा तिनको हत्या गरेको भन्दै अभियोग दर्ता गरेका छन्। मृतकको परिवारका सदस्यहरूले बताएअनुसार गत राति दीपङ्करलाई बारम्बार फोन गर्दा नउठाएपछि सिक्युरिटी एजेन्सीमा फोन गरेका थिए। यसपछि एजेन्सीका सदस्यहरू लक्ष्मीजोत इलाकामा गएर हेर्दा रक्ताम्मे अवस्थामा दीपङ्करको शव देखेपछि घटनाबारे पुलिसलाई खबर दिए। घटनाको खबर पाएर पुलिस घटनास्थलमा पुगेर शव उद्धार गरेर पोस्टमार्टमको लागि उत्तरबंग मेडिकल कलेज एवम् अस्पतालमा पठाउनको साथै घटनाको जाँच शुरू गरेको पुलिस सूत्रले जनाएको छ।