फुवागढीका युवाहरूद्वारा तयार फिल्म यसै सातामा प्रदर्शन हुने

मिरिक : मिरिक महकुमाको ग्रामीण क्षेत्रका युवाहरूले फिल्म निर्माणमा उत्साह देखाइरहेका छन्। मिरिकमा बितेको एक दशकलाई फर्केर हेर्नु हो भने यस क्षेत्रका युवाहरूले धेरैवटा चलचित्र निर्माण गरिसकेका छन्। यसै प्रसङ्गमा महकुमाको फुवागढी चियाबारीका दुईजना युवा सन्जीव तामाङ जेम्स अनि मुस्कान छेत्रीले आफ्नै प्रयासमा एउटा राज्य नामक फिल्म निर्माण गरेका छन्। भौतिक संसार भन्दा परमेश्वरको संसार कस्तो हुन्छ भन्ने तथ्यलाई उक्त फिल्ममा दर्शाइएको बताउँदै उक्त फिल्म निर्देशक सन्जीव तामाङ र निर्माता मुस्कान छेत्रीले यसै साताभित्र फिल्म प्रदर्शन हुने जानकारी दिएका छन्। पत्रकारहरूसित कुराकानी गर्दै दुवैले फिल्म निर्माणमा स्थानीय कलाकारहरूले अंश ग्रहण गर्ने मौका पाएको तथा उक्त फिल्म हेरेर दर्शकवर्गबाट  सकारात्मक प्रतिक्रिया एवम् सुझाउ पाए आगामी दिनमा नयाँ योजनाको लागि प्रोत्साहन प्राप्त हुने बारे आशावादी रहेको बताए।