गिरी जयन्ती गोजपु-ले खरसाङमा प्रतियोगिताको साथमा मनाउने

खरसाङ (निसं): गोर्खा जन पुस्तकालय खरसाङले यस वर्ष कवि अगमसिंह गिरीको 97औँ जन्मजयन्ती भव्यतापूर्वक पालन गर्ने भएको छ। यसबारे गोर्खा जन पुस्तकालयका सचिव विनोद रसाइलीले बताए अनुसार कविता गोष्ठी, गिरीका कवितामाथि आवृत्तिहरू गरेर गोजपु-ले विगत धेरै वर्षदेखि यस दिनलाई स्मरणीय बनाउँदै आइरहेको तथ्य सर्वविदित छ। यसै क्रमलाई अटुट राख्दै यस वर्ष भने गोजपुले गिरीका चर्चित कविताहरूको आवृत्ति प्रतियोगिता खुल्ला रूपमा आयोजित गरेर उक्त दिनलाई गिरीमय बनाउने अठोट गत मासिक सभामा तय गरिसकेको छ। प्रतियोगितामा स्कूल-कलेजका विद्यार्थीहरूदेखि अन्य सामान्य प्रतियोगीहरूले पनि अंश ग्रहण गर्न सक्नेछन्। प्रतियोगीहरू छनौट प्रतिक्रियाबाट पार भएर अन्त्यमा पाँचजना प्रतियोगीहरू फाइनल चरणमा पुग्नेछन्, जसले गिरी जयन्तीको दिन आफ्नो प्रस्तुति दिएर खिताब आफ्नो नाम गर्न सक्नेछन्। अंशग्रहण गर्नेहरूले नाम बुझाउने अन्तिम मिति 17 दिसम्बर तोकिएको छ। यस अतिरिक्त विस्तृत जानकारीको निम्ति सचिव विनोद रसाइली अनि उपाध्यक्ष प्रकाश प्रधानसँग पनि सम्पर्क गर्नसक्ने बताइएको छ।