दार्जिलिङ : केही दिन अघि फुबसेरिङ चिया कमानको 10 नम्बरबाट केही व्यक्तिहरूले अध्यक्ष बिमल गुरुङलाई भेटेर गाउँको समस्याहरु हेरिदिने अनुरोध गरेकोले उक्त कुरालाई स्वीकार गरेर गोजमुमो अध्यक्ष बिमल गुरुङले फुबसेरिङ क्षेत्रको परिभ्रमण गरे। त्यहाँ विशेष गरेर तिनीहरूको गाउँसम्म पुग्ने सडकको एकदमै दयनीय अवस्था रहेकोले यसको निरीक्षण गरे। प्राप्त जानकारी अनुसार 2017-को आन्दोलन अघि नै बिमल गुरूङको पहलमा जेसीबी लगाएर खनी दिएको त्यो बाटोमा अहिलेसम्म पनि न त अलकत्रा लगाउने काम भएको छ, न त त्यसलाई कुनै प्रकारको मरमति गर्ने काम नै भएको छ।
बाटोको यस्तो अवस्था रहेकोले बिमारीहरु अस्पताल लैजानु तथा घर ल्याउन तथा कुनै पनि संकटको बेलामा आउ-जाउ गर्नमा धेरै ठूलो असुविधा झेल्न परिरहेको त्यहाँका मानिसहरु बताउँछन्। त्यस बाटोको स्थलगत निरीक्षण गर्दै बिमल गुरूङले केही क्षण गाउँलेहरूसित भला कुसारी गरे। यसै भ्रमण अवधी तिनी त्यस ठाउँका एकजना बिरामीलाई हेर्न बिरामीको घरसम्म पुगे भने बिरामीको उपचारको निम्ति आफ्नो पक्षबाट केही सहयोग गर्ने वचन पनि दिए। गोजमुमो अध्यक्ष बिमल गुरुङले आफ्नो क्षेत्रको भ्रमण गरिदिएकोमा स्थानीय वासिन्दाहरु निक्कै हर्षित बनेको देखियो।