गोजमुमो मिरिक महकुमा समिति विघटन

मिरिक: गोर्खा जनमुक्ति मोर्चा मिरिक महकुमा समितिलाई आज विघटन गरिएको घोषणा गोजमुमो केन्द्रीय सह-सचिव विनोद खालिङले मिरिकमा गरे। मिरिकमा पत्रकार सम्मेलन गरेर तिनले पार्टी अध्यक्ष बिमल गुरूङसित सर-सल्लाह गरेर नै आजदेखि मिरिक महकुमा समिति विघटन गरेको घोषणा गरिएको किरा बताए। पार्टीको मिरिक महकुमा समिति केही समयदेखि निष्क्रिय रहेकोले विघटन भएको घोषणा गरिएको हो भन्दै तिनले अब चाँडै मिरिक महकुमा समितिको नयाँ कमिटी गठन गरिने जानकारी गराए। तिनले बताए अनुसार मिरिक महकुमाको चारवटा समष्टिका प्रतिनिधिहरूलाई सहभागी गराएर गोजमुमो मिरिक महकुमा समितिको नयाँ कमिटी गठन गरिने, जसमा शाखा समितिको सिफारिसमा समष्टिले दिएको प्रतिनिधिहरूद्वारा गठन गरिने भएको छ। पार्टीलाई दह्रिलो बनाउने उद्देश्य लिएर यो पहल गरिएको हो भन्दै पार्टीभित्र कुनै मतभेद नरहेको तिनले दावी गरे। नयाँ मिरिक महकुमा समिति गठन गरेपछि पार्टीको साङ्गठनिक विस्तार साथै गतिविधिहरू तीव्र पारिने बताए। आजको पत्रकार सम्मेलनमा गोजमुमो केन्द्रीय समिति सदस्य रूपेश राई, नारी मोर्चा केन्द्रीय साङ्गठनिक सचिव ललिता छेत्री, गोजमुमो सौरेनी समष्टि अध्यक्ष संगम राई, युवा मोर्चा मिरिक महकुमा समिति अध्यक्ष विक्रान्त राई, मिरिक थर्बु डुप्टिन समष्टि सचिव राम राई, सियोक ओकाइटी गोपालधारा समष्टि अध्यक्ष राजीव राई, अर्पण राई आदि उपस्थित थिए।