जीटीए कर्मचारीहरूले पटेका पड्काएर मनाए खुशी

खरसाङ (निसं): खरसाङको कार्यक्रममा राज्यकी मुख्यमन्त्री ममता ब्यानर्जीले जीटीए कर्मचारीहरूको लागि गरेकी घोषणापछि आज खरसाङ बजारमा जीटीए कर्मचारीहरूले पटेका पड्काएर खुशी मनाए। खरसाङको मन्टिभियट खेल मैदानमा मुख्यमन्त्री ममता ब्यानर्जीले आज जीटीए कर्मचारीहरूको अवकाशपछि 20 लाख रूपियाँ ग्राजुएटीको रूपमा दिइने घोषणा गर्नको साथै कर्मचारीहरूको वेतनमा संसोधन गरिने घोषणा गरेको केही क्षणमा खरसाङ बजारमा आएर जीटीए कर्मचारीहरूले पटेका पड्काएर खुशी मनाए। कर्मचारीहरूले अनित थापा जिन्दावादको नारा पनि लगाए। सबै कर्मचारीहरू खुशी भएर पटेका पड्काउँदै मुख्यमन्त्री ममता ब्यानर्जी र जीटीए चिफ् अनित थापालाई धन्यवाद दिएका छन्। यस अवसरमा पत्रकारहरूसित कुराकानी गर्दै जीटीए कर्मचारी संगठनको महासचिव सुवास बस्नेतले जीटीए कर्मचारी संगठनको पक्षमा जीटीए चिफ् अनित थापा र मुख्यमन्त्री ममता ब्यानर्जीलाई धन्यवाद दिएका छन्। उनले यो जीटीए कर्मचारीहरूको दीर्घकालीन मांग रहेको र यो घोषणापछि लिखित रूपमा पनि आउने आशा व्यक्त गरे। तिनले जसरी हाम्रो मांग अनुसार आज घोषणा भयो र हाम्रो स्थायीकरणको मांग पनि यसरी नै पूरा हुनेछ भनी आशा व्यक्त गरे।