बिजनबारी : बिजनबारीको विद्युत कार्यालयमा गत 16 सेप्टेम्बरदेखि इन्टरनेट परिसेवा ठप्प बनेपछि कुनै पनि लेनदेनका कार्यहरू नभएकोले ग्राहकहरू समस्यामा परेका छन्। टाढा टाढाबाट बिजुलीको बील तिर्न आएका उपभोक्ताहरू नेट परिसेवा नभएपछि घर फर्कन पर्ने स्थिति दैनिक रूपले भइरहेको उपभोक्ताहरूको गुनासो रहेको छ। यसरी बील नबुझाई घर फर्कन पर्दा उपभोक्ताहरूलाई आर्थिक रूपले अतिरिक्त भार परेको पनि उपभोक्ताहरूको भनाइ रहेको छ। यता विद्युत कार्यालयसित यसबारे जान्न चाहँदा गत 16 सेप्टेम्बरदेखि नै बीएसएनएल इन्टरनेट परिसेवा ठप्प रहेको कोषाध्यक्ष हेमन्त थापाले जनाए। यसबारे धेरैपल्ट बीएसएनएल कार्यालय अनि अधिकारीलाई फोन गर्दा समेत कुनै पहल नगरेको तिनले बताए। उपभोक्ताहरूले यस्तो अवस्थामा अनलाइन बील भुक्तान गर्न सक्ने तथा बील र रकम कार्यालयमा जम्मा गरेर यसको रसिद पछि लैजान सक्ने तिनले थप जनाएका छन्।